కొడుకులు సరిగ్గా చూసుకోవట్లేదని ఆస్తిని అంజన్న పేరు మీద రాసిన తండ్రి.. చివర్లో ట్విస్ట్

తమ పిల్లలు ప్రయోజకులు కావాలని.. వాళ్లకు మంచి జీవితం ఇవ్వాలని తల్లిదండ్రులు అహర్నిశలు కృషి చేస్తుంటారు. ఇందుకోసం తాము పస్తులుండి మరీ.. తమ పిల్లల కడుపు నింపుతుంటారు. తమ పిల్లల భవిష్యత్తు కోసం రాత్రింబవళ్లు చెమటోర్చి రూపాయి రూపాయి పొదుపు చేసి ఎంతో కొంత ఆస్తిని కూడబెట్టి ఇస్తుంటారు. అయితే.. కొందరు మాత్రం.. పెద్దవాళ్లయ్యాక కష్టపడి పెంచిన తల్లితండ్రులను పట్టించుకోకుండా గాలికి వదిలేస్తున్నారు. జన్మనిచ్చి.. విద్యాబుద్ధులు నేర్పించి.. ప్రయోజకులను చేసిన తల్లిదండ్రులకు.. కనీసం పట్టెడన్నం కూడా పెట్టకుండా కఠినంగా వ్యవహరిస్తున్నారు. అలాంటి కుమారులకు బుద్ధి చెప్పేందుకు ఓ తండ్రి కఠిన నిర్ణయం తీసుకున్నాడు.

చివరి దశలో తల్లిదండ్రులకు కడుపు నిండా అన్నం పెట్టటం చేతకాదు కానీ.. వాళ్లు కష్టపడి సంపాధించిన ఆస్తులు దక్కించుకునేందుకు మాత్రం వారసులు కొట్టుకుంటుంటారు. కొందరైతే.. ఆస్తి లాగేసుకుని తల్లిదండ్రులను ఇంట్లో నుంచి బయటకు గెంటేస్తారు కూడా. అలాంటి దుస్థితి తనకు కూడా వస్తుందని ఆలోచించిన ఓ తండ్రి.. తన కుమారులకు షాక్ ఇచ్చే నిర్ణయం తీసుకున్నారు. సిద్దిపేట జిల్లా చిన్న కోడూరు మండలం అలీపూర్‌కు చెందిన బాలయ్య అనే వ్యక్తి ఓ సంచలనాత్మకమైన నిర్ణయం తీసుకున్నారు. తాను కనిపెంచిన కుమారులు తనకు పట్టెడన్నం కూడా పెట్టట్లేదని.. సరిగ్గా చూసుకోవట్లేదని.. తీవ్ర మనస్తాపానికి గురైన బాలయ్య.. తన పేరు మీద ఉన్న ఆస్తి మొత్తాన్ని కొండగట్టు ఆంజనేయస్వామిని సమర్పించాలని నిర్ణయించుకున్నారు.

తాను తీసుకున్న నిర్ణయం ప్రకారం.. కొండగట్టుకు చేరుకుని తన ఆస్తికి సంబంధించిన పత్రాలను దేవస్థానంలోని హుండీలో వేసేందుకు సిద్ధమయ్యాడు. అయితే చివరి నిమిషంలో విషయం తెలుసుకున్న పూజారులు.. ఆ పత్రాలను హుండీలో వేస్తే.. తాను అనుకున్నట్టుగా ఆ ఆస్తి స్వామివారికి చెల్లదని వివరించారు. దీంతో.. తన ఆస్తిని కొండగట్టు అంజనేయ స్వామి పేరుతో పట్టా చేస్తానని.. అందుకు తగిన ఏర్పాట్లు చేయాల్సిందిగా అధికారులను బాలయ్య కోరారు.

మరి.. కడుపు కాలిన తండ్రి తీసుకున్న ఈ నిర్ణయాన్ని అతని కుమారులు ఎలా తీసుకుంటారు.. ఏవిధంగా స్పందిస్తారన్నది ఇప్పుడు సర్వత్రా చర్చనీయాంశంగా మారింది. తన తండ్రిని దగ్గరికి తీసుకుని బాగా చూసుకుంటారా.. లేదా అలాగే రోడ్డున వదిలేస్తారా అన్నది చూడాలి మరి.. ఆ కుమారులకు అంజన్న జ్ఞానం ప్రసాదిస్తారో లేదో..?

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-30T13:14:24Z dg43tfdfdgfd